ضجة واسعة أثارها النظام الغذائي المعروف باسم "نظام الطيبات"، الذي اجتاح مواقع التواصل الاجتماعي بعد وفاة مؤسسه الدكتور ضياء العوضي، ما دفع النجم المصري تامر حسني للتدخل بمناشدة عاجلة لوزارة الصحة والقامات الطبية في مصر.
لماذا ناشد تامر حسني وزارة الصحة المصرية؟
ونشر حسني عبر حساباته على مواقع التواصل الاجتماعي، منشورًا تحدث فيه عما وصفه بـ"الفتنة الغذائية"، مناشدًا وزارة الصحة المصرية وكبار الأطباء وأصحاب المستشفيات بالتدخل، وتقديم شرح مفصل عما يدور حول بعض الأطعمة.
وكتب النجم المصري في منشور عبر حسابه على "فيسبوك": في ظل الفتنة الغذائية اللي حاصلة في مصر وحديث كل الناس دلوقتي عن إيه المفيد لينا وإيه المضر، هل ممكن أناشد وزارة الصحة المصرية وكبار الدكاترة المختصة وأصحاب المستشفيات شرح مفصل عن إيه الأكل المفيد لينا وإيه اللي مش مفيد؟ ويا ريت يكون شرح مفصل يفهمه الشخص العادي من غير أي مصطلحات طبية أجنبية.
وعدد حسني أصنافًا بعينها هي التي يدور حولها الجدل الإلكتروني الأيام الماضية، وكتب: أولًا الخضار، أمثال الخس، والجرجير، وورق العنب، وكل الورقيات مفيدة ولا لأ؟ وإزاي نطمن إنها مش مرشوشة مواد تمرض الناس.
وتابع: ثانيًا البيض والفراخ اللي في بلدنا ناكله إزاي؟ وإزاي نميز ونطمن إنه مش محقون وإزاي نعرفه لو محقون؟ ثالثًا شرب المية بكثرة كما تعلمنا مفيد ولا لأ؟ رابعًا الحليب مضر ولا كويس وإيه الصح اللي نشربه، خامسًا الأدوية لازم تتاخد ولا مش لازم ولا مش أي أدوية تتاخد.
وطلب تامر حسني من الوزارة المصرية المختصة تقديم المعلومات بشكل مبسط يناسب جميع الفئات بدرجاتها العلمية، وكتب: أناشد وزارتنا المصرية تعملنا ڤيديوهات، حد يطلع يكلمنا بالعامية ويرد بالتفصيل وبالأدلة العلمية على كل ده، ويا ريت يساعدني صديقي المحترم الأستاذ الفاضل أيمن عباس، بما إنه صاحب أكبر المستشفيات، يا ريت يطلعلنا دكاترة من عنده مختصة يعملوا ڤيديوهات ترد على كل اللي حاصل في مجتمعنا.
وأكمل: بناشد برضو الدكتور العظيم مجدي يعقوب يدينا من خبرته العظيمة، والدكتور الكبير حسام موافي، ويساعدونا الفترة دي كشعب ويريحونا من الجدل الفظيع ده، لأن محدش بقى عارف ياكل إيه ومياكلش إيه، وثوابت كتير اتغيرت بين يوم وليلة. أرجوكوا متسيبوناش كده لا إحنا ولا ولادنا.
واختتم تامر منشوره: وأرجع وأقول محتاجين حد يكلمنا بطريقة بسيطة عامية يشرح فيها بالتفصيل وبالأدلة إيه غلط وإيه صح، وأنا ليه بقول محتاجين أكتر من جهة تتكلم؟ عشان كلنا نطابق الكلام ببعضه مع المنطق ونحكم صح.
تفاصيل أزمة "نظام الطيبات" في مصر
قبل أسبوع، اجتاحت مواقع التواصل الاجتماعي في مصر موجة دعم لنظام الدكتور الراحل ضياء العوضي، الذي يسمى بـ"نظام الطيبات"، بدعوى أنه يعالج من كل الأمراض، بما فيها المزمنة والمناعية، ويساعد في خسارة الوزن وتحسن الصحة بشكل كبير.
وفي المقابل، خرج عشرات الأطباء والمختصين الذين وصفوا هذا النظام بـ"القاتل"، خصوصًا لأصحاب الأمراض المزمنة كالسكري والكوليسترول والقلب، والذين يتبعون أصنافًا يضمها "نظام الطيبات" تحمل قدرًا كبيرًا من السعرات مع إيقاف الأدوية، ما يعرض حياتهم للخطر.
ويعتمد نظام الطيبات على وجبتين فقط في اليوم مع الصيام البيني، إذ يركز على النشويات (الخبز الأبيض، والأرز، والمكرونة، والبطاطس)، والبروتينات (الأسماك بأنواعها، واللحوم الحمراء)، والدهون الصحية (السمن الحيواني، والزبدة، والقشطة، وزيت الزيتون)، بالإضافة إلى بعض البقوليات. كما يسمح بتناول السكر والعسل والحلويات المنزلية، مثل المهلبية وقمر الدين.
وتتضمن قائمة الأطعمة الممنوعة في هذا النظام: مشتقات الألبان (الجبن، والزبادي، والحليب)، والبيض، والدواجن بجميع أنواعها، والبقوليات (الفول، واللوبيا، والبسلة)، والخضروات النيئة (الخيار، والخس، والجرجير، والبقدونس، والجزر، والفلفل الأخضر والألوان)، الفواكه مثل البطيخ، والشمام، والمانجو، والبرتقال، واليوسفي، والكيوي، والكاكا، إضافة إلى الأدوية، مع التقليل من شرب الماء.
