شهد الوسط الغنائي خلال الساعات الماضية تصاعدًا جديدًا في الجدل الدائر بين عدد من الملحنين والمطربين، بعدما خرج الملحن سامر أبو طالب للرد على تصريحات الفنان رامي صبري بشأن عدم تعاونه مع بعض الملحنين والشعراء، مؤكدًا أن الأزمة لا تتعلق بنقص الأفكار أو عدم التطور، وإنما بعدم الرد على الرسائل والاستماع إلى الأعمال الجديدة.
سامر أبو طالب يرد على رامي صبري
نشر سامر أبو طالب مقطع فيديو عبر حسابه الرسمي على موقع "إنستغرام"، أوضح خلاله موقفه من الأزمة المثارة أخيرًا، خاصة بعد تصريحات الملحن نادر نور حول ابتعاده عن الساحة الفنية وصعوبة التواصل مع بعض المطربين.
وقال سامر أبو طالب: الحقيقة أنا مبحبش أطلع أتكلم عن أي حاجة عمومًا، وبحتفظ برأيي دايمًا بيني وبين نفسي وبركز في شغلي، والحمد لله بنجح وخطواتي كويسة. الفترة اللي فاتت بقالنا كام يوم زمايلي الملحنين والشعراء حاسين إن فيه تجاهل، وطلعوا اتكلموا من قلبهم وقالوا حاجتين مضايقينهم، وأنا ضميت صوتي لصوتهم.
وأضاف: التجاهل هنا مش معناه إننا بنشحت من حد يبص علينا أو يسمعنا، لا، فكرة التجاهل هنا إننا نبعت لحد عرفنا ومسجل أرقامنا وفي بينا كلام وقعدات مزيكا وبره المزيكا، وفي ناس اشتغلنا قبل كده مع بعض ونجحنا، ففكرة إنك ما تردش أصلًا دي مش حلوة أبداً لا في حقك كنجم ولا في حقنا كفنانين وصناع، لأن الموضوع ده مؤذٍ نفسيًا جدًا.
وتابع: تقدر بكل بساطة تقول لا، مش عاجبني، أو لا مش حلو، أو مش ده اللي أنا عايزه، ومش هنزعل، بالعكس، مجرد الرد ده تقدير منك للشخص اللي بيبعتلك سواء كان جديد أو ليه اسم.
سامر أبو طالب يوجّه رسالة مباشرة إلى رامي صبري
وجّه سامر أبو طالب حديثه مباشرة إلى الفنان رامي صبري، قائلًا: هخص بالذكر النجم الكبير رامي صبري اللي طبعًا أنا بحبه جدًا على المستوى الشخصي والفني. مبدئيًا يا رامي محدش جاب سيرتك أصلًا في الموضوع ده خالص لا من قريب ولا من بعيد.
وأضاف: آه أنت من الناس اللي ما بتردش، وأنت الوحيد اللي طلعت تتهم الصناع إنهم ما بيتطوروش وما بيجددوش ومعندهمش جديد. لا يا رامي اسمحلي أقولك لا، إحنا عندنا جديد ومتطورين، وأنا هتكلم عن نفسي، أنا بشوف نفسي مميز جدًا في حتتي وفي ألحاني، وبعمل حاجات الحمد لله متطورة وجديدة.
واستكمل: أنت بس ما بتفتحش الشات عشان تاخد بالك سامر أبو طالب باعتلك إيه أو غيره. فقبل ما تتهمنا يا رامي افتح الشات واسمع، عشان يبقى لما تتكلم تتكلم عن حقيقة، لكن الاتهام اللي اتهمته للناس، وخصوصًا إن الناس دي ليها أسماء وليها نجاحات كبيرة.
ماذا قال رامي صبري عن الملحنين والشعراء في مصر؟
كان الفنان رامي صبري قد رد على الانتقادات التي طالته بعد منشور تحدث فيه عن بعض الملحنين والشعراء، مؤكدًا في مقطع فيديو عبر خاصية "ستوري" على "إنستغرام" أن المشكلة ليست في الملحنين أو الشعراء، وإنما في قلة الأعمال المختلفة التي تصله.
وقال رامي صبري: في ناس مضايقة إني كتبت ستوري إن الملحنين اللي بيبعتولي شغل ما بيعملوش حاجة جديدة ومختلفة، أيوة دي حقيقة، يعني أنا أعمل الأغنية وخلاص عشان هي اتبعتتلي؟.
وأضاف: أنا بعمل الحاجات اللي شايفها من وجهة نظري مختلفة وجديدة، وده مش المفروض يضايق حد. المشكلة مش في الملحنين والشعراء، كلهم كويسين، لكن إحنا مطربين مش كتير، وفي السوق المصري حوالي من 7 إلى 10 مطربين بالكتير، بينما الملحنين والشعراء والموزعين أعدادهم كبيرة جدًا.
كما وجّه الشكر إلى المستشار تركي آل الشيخ، رئيس الهيئة العامة للترفيه بالمملكة العربية السعودية، على دعمه للفنانين.
أزمة نادر نور تشعل الجدل
تعود بداية الأزمة إلى منشور كتبه الملحن نادر نور عبر حسابه على "فيسبوك"، كشف خلاله معاناته في العودة إلى الساحة الغنائية، مؤكدًا أنه حاول التواصل مع عدد من النجوم دون جدوى، وأنه اصطدم بحالة من التجاهل وعدم الرد.
وقال نادر نور إنه طرق جميع الأبواب خلال السنوات الثلاث الماضية للعودة إلى العمل، لكنه واجه صعوبة في استعادة تواصله مع عدد من نجوم الغناء الذين سبق أن حقق معهم نجاحات فنية.
دعم تركي آل الشيخ لنادر نور
عقب منشور نادر نور، حرص المستشار تركي آل الشيخ، رئيس الهيئة العامة للترفيه في السعودية، على دعمه برسالة مباشرة قال فيها: إنت فنان كبير وأنا حابب أشتغل معاك، وهو ما لاقى تفاعلًا واسعًا داخل الوسط الفني وعلى مواقع التواصل الاجتماعي.
