خرج مغني المهرجانات مسلم في بث مباشر عبر حسابه الرسمي على موقع "إنستغرام"، ليكشف عن تفاصيل طلاقه من البلوغر يارا تامر، مؤكداً أن السبب وراء الانفصال يعود إلى ما وصفه بعدم احترامها له في فترة مرضه وغيابه.
أول تعليق من مسلم بعد طلاقه من يارا تامر
قال مسلم: ده تأكيد للناس إللي طلعت وقالت إني مطلقتش، وموضوع طلاقي ملهوش علاقة بأهلي ولا أي أحد. أنا طلّقت مراتي لأنها محترمتنيش في غيابي وفي تعبي، وطلعت اتكلمت في حاجات أنا قولتلها متتكلميش فيها. أنا مش واخد أهلي وطلاقي تريند، لأني طول عمري تريند، وفرحي كان تريند، والناس متعاطفة مع يارا من أول المشاكل خالص.
مسلم يدافع عن يارا رغم الطلاق
رغم تصريحاته، شدّد مسلم على أن زوجته السابقة كانت إنسانة محترمة وقدمت له الكثير، قائلاً: يارا كانت محترمة جدًا معايا، وعمرها ما قصرت في حاجة، إنسانة على أكمل وجه، خدماني في كل حاجة، وكانت بتساعدني في حياتي الشخصية.
مسلم يهاجم أسرته
خلال البث المباشر، انتقد مسلم عائلته، كاشفاً عن معاناته منذ طفولته، قائلاً: لسوء حظي أهلي مكنوش جنبي زيادة عن اللزوم، ولا كانوا حنينين عليَّ. وأنا عندي 15 سنة سبت البيت وعشت حياتي لوحدي؛ لأن إخواتي كانوا بيمدّوا إيديهم عليَّ لما يشوفوني كويس في حاجة، ويتلمّوا عليَّ ويضربوني وكرّهوني في حياتي. كنت بتضرب وبيتقلل مني وبتهان، وأمي مكنتش بتعرف تتكلم لأن أبويا كان ميتاً.
وأضاف مسلم أنه شقِي كثيراً حتى وصل إلى النجاح، لكن عائلته لم ترَ فيه سوى "الفلوس"، موضحاً: أنا من الناس إللي شقيت جامد، وبعد ما نجحت همه مشفوش مسلم غير فلوس وبس. من أول المشاكل وأنا مبتكلمش، لكن تعبت من كثر الضغط والكلام إللي زي الزفت بتاعهم.
وكشف عن تفاصيل جديدة تخص استغلال أشقائه له، قائلاً: مصدر رزقي كان الحفلات، ولما وقف ده الدنيا مبقتش أفضل حاجة معايا. إخواتي كانوا بييجوا معايا الشغل يطلبوا حاجات بنص الفلوس إللي بشتغل بيها، وأما أعمل أي مشروع ياخذوا أصحابهم ويطلبوا حاجات ببلاش. غير الفضائح إللي بيعملوها ليَّ. ولو وريتكم الإسكرينات قد إيه بعثت لأختي فلوس، بس لولا العيبة مش هعمل كده.
مسلم: تزوجت بدري لأمنع نفسي من الغلط
عن حياته الزوجية، أوضح مسلم أنه تزوج في سن صغير لحماية نفسه، لكن أسرته كانت سبباً مباشراً في جميع طلاقاته السابقة: تجوزت بدري عشان أمنع نفسي من الغلط، وهمه السبب في كل طلقاتي. مفيش واحدة اتجوزتها ومعملوش مشاكل معها. كنت عامل صندوق بحط فيه فلوس لأهلي بعد كل أوردر عشان أوزع عليهم، لكن وصلوا إنهم عايزين يقعدوا معايا في نفس البيت إللي فيه مراتي رجالة وستات، وكمان مش عايزينها تتكلم.
إعلان طلاق مسلم
أعلن مسلم بشكل رسمي انفصاله عن يارا تامر، وذلك من خلال رسالة عبر خاصية "ستوري" بحسابه على "إنستغرام"، كتب فيها: تم الطلاق بيني وبين مراتي، وده بسبب مشاكل أهلي. فضحتني قدام الناس. حسبي الله ونعم الوكيل في إللي كان السبب. مش مسامح أمي، ولا إخواتي، ولا أختي، على إللي وصّلوني ليه. بعد الست دي مفيش ست هتخش حياتي تاني. شكراً أوي على الظروف.
