تحدث النجم السوري يزن السيد وزوجته لمى الرهونجي عن كليب جديد جمعه مع النجمة سيرين عبد النور، والذي حصد تفاعلًا واسعًا على مواقع التواصل الاجتماعي.
كما تطرقا في حديثهما لـ"فوشيا"، إلى حضور ابنهما آدم على السوشيال ميديا، وعلاقتهما بأصالة نصري، والمواقف العائلية خلف الكواليس.
يزن السيد: الكليب مع سيرين عبد النور "عمل سوكسيه"
كشف يزن السيد عن تجربته الجديدة في كليب سيرين عبد النور "عاملن عقدة" فقال: والله هو الاقتراح من سيرين والمخرج جو بورعد، المشروع حلو.. كانت كل الظروف تبعه منيحة ومناسبة، وفرصة حلوة مع سيرين، وهيك عملنا شي حلو، والحمد لله عمل كتير سوكسيه الكليب.
وعن حضور لمى الرهونجي إلى تصوير الكليب، قال مازحًا: لا ما غارت، بس إجت على الكليب.
لمى الرهونجي: ما بغار... وآدم طفل موهوب
عن مشهد الغيرة من الكليب، ردت لمى بشكل مباشر: سألوني قبل، قلت لهم لا.. not anymore. ما غرت، أنا أصلاً ما بغار، قاطعين هاي المرحلة.
وعن الفيديو الذي انتشر لابنها آدم أثناء مشاهدته للكليب، علّقت: في كتير عالم انتقدوا هذا الشي، بس هو بالنهاية طفل، ما فيهم يحكموا عليه أو يقولوا ما بصير تقول لأبوك سكوت أو كذا، بالنهاية هدول أطفال.. يعني حتى إذا فاتوا على السوشيال ميديا، هذا العمر ما فيك تعمل له كنترول.. وهو شي عفوي منه، وأنا دايمًا بحب صوّر هيك لقطاته العفوية وبشاركها مع الناس، وبتطلع على التريند.
وحول حذف التعليقات السلبية على منشورات آدم، أوضحت: ما فكرت بهالموضوع، لأنه لساته صغير، يعني بده كم سنة ليبلّش يقرأ.. بس فكرة حلوة، لازم يبلّش معي.. بس أنا أكيد رح علّمه متل ما علّمت أصالة إنه يكون آخر همه التعليقات السلبية، لأنه بالنهاية كل واحد بيعرف حاله.
لمى: آدم بيحب التمثيل والكاميرا... بس الدراسة أولاً
عن احتمالية دخول آدم مجال الفن، صرّحت لمى: ما فيك تجبر طفل بهاد العمر على شي، يعني هو حابب هالقصتين. وقت نكون عم نصور، هو بينزعج إذا وقف التصوير، لسه بده يصور، هو بيحب هذا الشي، فأكيد ما بيأثر على دراسته طبعاً، لأنه الدراسة هي رقم واحد، لكن إذا نجح وأبدع بالميديا ليش لأ.
أصالة الرهونجي: لا بتحب السوشيال ميديا ولا الغناء
أما عن ابنتها من طليقها أنس نصري "أصالة"، فكشفت لمى أنها بعيدة عن أجواء الشهرة: أصالة ما بتحب الأضواء، رغم محاولاتي بإقناعها، ما أخذت صفات أصالة نصري الكبيرة. والله دايمًا بقولها يارتك أخذت بس ربع صوتها لعمتك، بس آخدة منها اللطافة، آخدة منها الجمال، يعني في صفات أكيد، الهدوء، يعني في صفات من عمتها.
تواصل دائم مع أصالة نصري... وزيارة الشام مؤجلة
عن علاقتها مع شقيقة طليقها النجمة أصالة نصري، قالت لمى: أكيد في تواصل، بتحبّه كتير لآدم، وبتحضرو وبتبعتلي كتير كلام حلو عنه.. إن شاء الله لتهدى الأوضاع رح تجي، يعني حاطة ببالها، بس لسه ما في شي مؤكد.
وحول تسمية ابنتها على اسم أصالة نصري، قالت لمى: أصالة بنتي كتير مبسوطة بهالاسم، وعمتها مبسوطة وبتحبني، يعني أحد أسباب محبتها إلي لأني أنا اللي اخترت الاسم مو أبوها.. قد ما أنا بحب أصالة من صغري.
