شاركت الفنانة أيتن عامر جمهورها، في حسابها الرسمي على موقع "إنستغرام"، صورًا تجمعها بوالدها باستخدام تقنية الذكاء الاصطناعي (AI)، التي أصبحت من أبرز ترندات مواقع التواصل الاجتماعي خلال الفترة الأخيرة.
رسالة أيتن عامر إلى والدها
أرفقت أيتن الصور برسالة مؤثرة إلى والدها الراحل، قالت فيها: وحشتني أوي أوي أوي وحقيقي محتاجالك، الدنيا مش حلوة يا بابا ولا الناس كمان، كل مرة بتحط في اختبار صعب أو أزمة مفيش حد بيجي في دماغي غيرك، أول واحد بيبقى نفسي أجري عليه وأقوله الحقني بيبقى انت.
وأضافت أيتن: وجودك كان هيفرق أوي، يمكن عمري ما قولت إن غيابك مسببلي أزمة كبيرة ولا قولت اللي جوايا، بس هييجي يوم وأبقى قوية كفاية إني أواجه وجع قلبي وأطلع كل الكلام اللي جوايا. زعلانة منك في حاجات ومفتقداك في حاجات أكثر بكتير، ومتاكدة إنك لو كنت موجود كنت هتبقى السند، بس غيابك خلاني أنا السند لنفسي وللي حواليا كمان، لأني فيا منك كتير خصوصًا قوتك وجدعنتك مع الكل.
قوة ابنة تبحث عن راحة
تابعت: بس أنا تعبت من كتر القوة وزهقت، مبقتش عايزة أدخل حروب ولا عايزة مشاكل، اللي عايز يفهم حاجة يفهمها واللي عايز ياخد فكرة ياخدها، لا هبرر ولا هدافع. بس اتطمن بنتك بميت راجل، ومهما قابلت هتفضل واقفة وراسها في السما، هتاخد استراحة محارب وعمرها ما هتبدأ حروب، بس دايمًا هتكون مستعدة لأي حاجة، وساعتها مش هيكون في احتمالية للخسارة.
وجع واشتياق لا ينتهي
استكملت الفنانة رسالتها قائلة: بحبك ووحشتني وزعلانة منك ومشبعتش منك، وجوايا وجع كبير، بس مش هقولك غير كلمة واحدة: اتطمن بنتك قدها.
صورة تحولت إلى لحظة بوح
اختتمت أيتن حديثها بقولها: الترند صورة متصورتهاش، ده ترند منتشر أوي اليومين دول، وأول ما السوشيال ميديا تيم بعتولي الصورة لقيتني بكتب كلام كتير من قلبي، وجوايا أكثر من كده مليون مرة. عندي صور كتير أوي ناقصها وجود بابا حقيقي، آسفة لو طولت عليكم شكلي فضفضت أوي.
آخر أعمالها الدرامية
يذكر أن أيتن عامر شاركت في الموسم الرمضاني الماضي بمسلسل "الحلانجي" بطولة الفنان محمد رجب، وشارك في العمل دانا حلبي، عبير صبري، أحمد وفيق، عمرو رجب، محمود قابيل، محمد لطفي، هالة فاخر، طارق صبري، ميمي جمال، إبراهيم السمان، وسامي مغاوري. المسلسل من تأليف محمود حمدان وإخراج معتز حسام.
