احتفلت الإعلامية أسما شريف منير بعيد ميلادها بطريقة مختلفة هذا العام، إذ شاركت جمهورها مجموعة من الصور ورسالة مطوّلة كشفت فيها عن تحوّل عميق في نظرتها للحياة، بعد سنوات من الألم والتعافي، مؤكدة أن هذه المناسبة لم تعد مجرد احتفال تقليدي بل محطة للتأمل وبداية جديدة.
تفاصيل رسالة أسما شريف منير في عيد ميلادها
نشرت أسما شريف منير صورًا من يوم عيد ميلادها، عبر حسابها على منصة "إنستغرام" وعلّقت قائلة: النهارده عيد ميلادي، وآخر سنة ليا في الثلاثينات.. ودي صور النهارده مافيش بهرجـة، زمان كان عيد ميلادي ده احتفال مش عادي، أهلي كانوا بيحجزوا أماكن ويجيبوا magician ويبعتوا دعوات لـ100 حد، وعمري ما كنت بشوف عيد ميلادي يوم عادي أو حاجة صغيرة، بالعكس كان دايمًا يوم كبير جدًا بالنسبالي، وكنت بعد الأيام من أول مارس لحد ما ييجي.
أسما شريف منير تكشف سنوات من الألم والتغيير الداخلي
كشفت أسما عن التحولات الصعبة التي مرت بها خلال السنوات الأخيرة، إذ قالت: بس آخر 3 سنين عدوا عليا بألم كتير وخيبات أمل وانكسارات وخذلان، وشوية شوية بطلت أهتم بعيد ميلادي، بطلت أخطط، بطلت أعد، بطلت أستنى، لأني كنت مشغولة أحاول أنقذ نفسي وأتعالج وأقوم وأشتغل على anxious attachment بتاعتي وأرمم قلبي من وجع ناس أذوني ومحاولوش عشاني وسابوني، وده أخد مني كتير أوي عشان أكون أحسن وأتعافى بجد.
وأضافت عن تحولها النفسي والروحي: ومن السنة اللي فاتت بدأت رحلتي الروحانية مع ربنا، ولقيت فيها حاجات كتير ولسه بدور ولسه بتعلم ولسه باكتشف، بس السنة دي جزء كبير مني مش عايز عيد ميلاد شكله حلو من بره بس مش حقيقي، أنا عايزة دعاء من القلب.
وأوضحت أسما تغير نظرتها للاحتفال، قائلة: ما بقيتش عايزة أتمنى وأطفي شمعة وأمنية سطحية وأقلب، بقيت أطلب من ربنا بشكل واضح اللي أنا حقيقي بتمناه، وعندي إحساس إن السنة دي هتكون سنة تحوّل حقيقي، سنة تطهير كبير ومعتقدات جديدة وبداية جديدة.
وتابعت: اللي بتمناه دلوقتي بسيط، إني أحس بالهدوء، وإني أحس إني محبوبة ومقدرة وآمنة بجد، وإني يكون حوالي ناس بتوعد إنها متمشيش.
أسما شريف منير تتحدث عن أهمية دعم العائلة
أشادت أسما شريف منير بالدعم الذي تلقته من أسرتها، خاصة زوجها وابنتها، قائلة: الناس دي موجودة في الصورة دي، الناس دي ما سابتنيش، وما خلتنيش أحس إني بشحت حب أو دعم، حبوني من غير أي طلبات أو مقابل، ووقفوا جنبي في أظلم أوقاتي وما حسسونيش أبدًا إني أقل من إني أتحب.
وأضافت: جوزي وبنتي ربنا يبارك فيهم، الاتنين دول بيتي، الاتنين دول صدقوا فيا وحبوني وأنا في أصعب أوقاتي، ومن غير ما أطلب، وبالحب ده رمموا جزء جوايا ما كنتش متخيلة إنه ممكن يتصلح، وشالوا عني إحساس الهجر وإحساس إني مش كفاية وإني مش مستاهلة محاولة.
وطلبت أسما في رسالتها الدعاء من جمهورها، قائلة: مش قادرة أوصف الامتنان ده بكلام، السنة دي أنا بطلب من كل حد يقرأ الكلام ده إنه يدعيلي إن ربنا يباركلي في الرحلة الجاية، وإن حياتي تتحول، وإن قلبي يرتاح، وإن الـ anxiety تمشي، وإني أقرب لربنا، وإن ربنا يرزقني الجنة.
وأضافت: اللي بتمناه دلوقتي مش كتير، بس أكون حوالي ناس ما بتأذينيش، ما بتtriggerنيش، ما بتسيبنيش، وما بتحسسنيش إني أقل.
واختتمت: السنة دي أنا عايزة ناس صح، وعايزة بدايات جديدة، وعايزة أستثمر في آخرتي، وعايزة أبقى أحسن نسخة من نفسي، أحسن زوجة، أحسن أم، أحسن صاحبة، وأي حد مش قادر يدي ده أو ممكن يأذيني أو يحسسني إني أقل، يارب أبعده عني وما يرجعش تاني.. من كل قلبي، كل سنة وأنا مطمنة، اللهم آمين.
