خرجت النجمة التونسية لطيفة عن صمتها، وتحدثت في آخر ظهور إعلامي عن كواليس رحيل والدتها منذ عامين، وكيف أثر عليها نفسيًا، وأصعب لحظات عاشتها في تلك الفترة.
ماذا قالت لطيفة عن كواليس رحيل والدتها؟
حكت الفنانة لطيفة، خلال استضافتها في برنامج "كلم ربنا" مع الإعلامي أحمد الخطيب على "الراديو 9090"، عن الفترة الصعبة التي عاشتها بعد وفاة والدتها، قائلة: أنا أمي كانت أغلى شيء في حياتي، وموتها خلاّني أعيش أسوأ أيام عمري، ومنتظره اليوم اللي أموت فيه علشان أروح عندها وأشوفها.
وتحدثت عن كواليس رحيل والدتها، موضحة: أمي ماتت فجأة، ما كنتش مريضة لكن في أيام قليلة صحتها تدهورت ودخلت المستشفى، يومها حسيت إن الدنيا وقفت، بس ربنا إداني قوة أتمالك وأنفذ وصيتها إنها تندفن جنب أبويا في تونس.
ما أصعب موقف في حياة الفنانة لطيفة؟
كشفت النجمة لطيفة عن أصعب موقف مر عليها طوال حياتها، وقالت: أصعب موقف عشته لما غسلّت إمي بإيدي ودفنتها ودخلّتها القبر بنفسي، وعمري ما خطر في بالي إني هعمل كده بس قلت لنفسي محدش هيغسلّها غيري.
وتابعت: أنا كنت ماسكة في أمي لآخر نفس، وهي في المستشفى كانت تقولي أنا بدعيلك حتى وأنا نايمة. وبعد وفاتها دخلت مصحة نفسية اتعالجت فيها شهور طويلة.
لطيفة تحكي مواقف صعبة من حياتها
تطرقت النجمة التونسية لمواقف عاشتها كانت قاسية، بداية من وفاة والدها وهي مراهقة، وانتهاء بوفاة والدتها مؤخرًا، وقالت: أول مرة كلمت فيها ربنا كان يوم وفاة أبويا وأنا عندي 13 سنة.
وأضافت: وقتها قولت يا رب متضيعناش، وأمي بقت المسؤولة عني أنا وإخواتي. ووقتها ورغم إن أمي ست بسيطة، ما بتقرأش ولا تكتب، لكن علمتني أنا وإخواتي القراءة والكتابة، وخلتنا من الأوائل في المدارس والجامعات.
وتابعت: أبويا مات ومات معاه 4 من إخواتي، رغم إن ده حادث جلل لكن يوم وفاة أمي كانت حاجة صعبة جدًا عليا، وحصلي موقف عمره ما حصل قبل كده، وهو إني أغسّلها وأدفنها بنفسي وهي ميتة.
وأكملت: الكل استغرب وإخواتي خرجوا من الأوضة اللي فيها جثمان أمي، ما كنتش مستوعبة لأن بفراقها مش هشوفها تاني، مش هقدر أبوس إيدها، ولا ألمس شعرها، ولا أبص في عينها، ولا آخد حضنها.
لماذا أودعت لطيفة في مصحة نفسية؟
كشفت لطيفة خفايا دخولها مصحة نفسية بعد وفاة والدتها، وحكت: بعد ما دفناها في تونس ورجعنا القاهرة، تاني يوم على طول جهزت شنطتي عشان أروح أعملها عمرة، لأني ما لقيتش مكان أرتاح فيه غير عند ربنا.
وتابعت: بس الحزن كان تقيل عليا، وفجأة لقيت نفسي بيغمي عليا والإسعاف خدتني، وفي المستشفى فُقت وفضلت أكلم ربنا وأشتكي من فراقها. قعدت شهرين أتعالج من الصدمة، والدكاترة قالولي ده من حزنك عليها، ورحت مصحة نفسية أتعالج.
لطيف تكشف سبب عدم إنجابها
كشفت لطيفة أن سبب عدم إنجابها هي والدتها، وقالت: أنا ماخلّفتش أولاد علشان والدتي لأني كنت بستعوض ده بأمي، كانت أمي وبقت بنتي، ولما كنت بسافر كنت برجع بسرعة عشان أبقى تحت رجليها، وربنا اداني بسببها نِعم كتير ما كنتش أتخيلها في يوم من الأيام.
واختتمت: رحيل أمي كان أصعب امتحان في حياتي، حسيت إني تايهة وضايعة، لكن في وسط كل ده كنت بشوف إيد ربنا بتسندني، يمكن الحزن ما بيروحش، والفقد بيعيش جوانا، بس اللي بيهون إن ربنا عمره ما سبني.
